José Mourinho është gjithnjë e më pranë rikthimit te Real Madrid. Sipas Fabrizio Romano, marrëveshjet mes Real Madrid dhe Benfica për emërimin e trajnerit portugez janë finalizuar, ndërsa tani pritet vetëm njoftimi zyrtar.
Edhe pse gjithçka mes palëve raportohet se është mbyllur, klubi madrilen nuk pritet ta zyrtarizojë menjëherë rikthimin e Mourinho. Florentino Pérez dëshiron që njoftimi të bëhet pas zgjedhjeve presidenciale në klub.
Zgjedhjet te Real Madrid janë planifikuar për më 7 qershor, ku Pérez do të garojë me themeluesin e Cox Energy, Enrique Riquelme. Për herë të parë pas shumë vitesh, gara për presidencën pritet të jetë reale dhe jo thjesht formale.
Ndërkohë, Mourinho thuhet se ka nisur tashmë bisedimet me Pérez për planet e merkatos së verës. Trajneri portugez po përgatit strategjinë për përforcimet që kërkon në skuadër, me synimin për ta rikthyer Real Madrid në një cikël të ri fitues.
Tani gjithçka mbetet në pritje të zgjedhjeve, përpara se klubi të bëjë hapin final dhe të konfirmojë rikthimin e Mourinho në “Santiago Bernabéu”.
