José Mourinho ka dalë hapur në mbrojtje të Vinicius Junior pas javës së tensionuar që pasoi kartonin e kuq ndaj Villarrealit dhe pezullimin me katër ndeshje të sulmuesit brazilian.
Në konferencën për shtyp para ndeshjes me Sevillan, trajneri i Real Madridit foli gjatë për situatën e Vinicius, ndërsa komentoi edhe deklaratat e fundit të presidentit të LaLiga-s, Javier Tebas.
Mourinho u tregua veçanërisht i ashpër kur u pyet për krahasimin që Tebas bëri mes mënyrës së funksionimit të Real Madrid TV dhe mekanizmave të propagandës së përdorur nga Joseph Goebbels.
“E keni parë tashmë se çfarë mendoj. Ju kërkoj të mos flasim më për këtë sepse ka disa kufij dhe kemi hyrë në një territor ku justifikimi mund të ekzistojë vetëm në një rast klinik. Përndryshe, nuk ka asnjë justifikim”, deklaroi Mourinho.
Portugezi shtoi se tifozët e Real Madridit po e kuptojnë gjithnjë e më mirë situatën me të cilën, sipas tij, po përballet klubi.
“Mendoj se tifozët e Real Madridit po kuptojnë gjithnjë e më shumë se me çfarë kanë të bëjnë. Edhe për prestigjin e madh që futbolli spanjoll ka jashtë vendit, është më mirë që këtë çështje ta mbajmë këtu dhe të mos dalë jashtë.”
Mourinho foli më pas për Vinicius, duke e përshkruar brazilianin si një person me të cilin është shumë e lehtë të punosh.
“Ai është një djalë fantastik. Kaloj disa minuta vetëm me të çdo ditë. E vlerësoj jashtëzakonisht shumë sepse arrin gjithmonë të jetojë dhe të mbijetojë me buzëqeshje.”
Trajneri shkoi edhe më tej, duke pranuar se nëse do të ishte në vendin e Vinicius, do të kishte kërkuar largimin nga Real Madridi.
“Po të isha në vendin e tij, ndoshta nuk do të isha këtu. Do të kisha detyruar një transferim në një vend ku do të respektohesha. Por nga besnikëria ndaj Real Madridit dhe dashuria për klubin, ai qëndroi. Beson se gjërat mund të përmirësohen dhe vazhdon ta ketë atë buzëqeshje. Askush dhe asgjë nuk mund t’ia heqë.”
Sa i përket pezullimit me katër ndeshje, Mourinho ironizoi vendimin, duke thënë se priste edhe një dënim më të rëndë.
“Jam i lumtur sepse do të kishte më shumë kohë për të luajtur. Mendova se do t’i shtonin edhe një ose dy ndeshje të tjera.”
Mourinho foli gjithashtu për merkaton e dimrit, duke bërë të qartë se nuk po kërkon përforcime dhe se është i kënaqur me skuadrën aktuale.
“Nuk po kërkoj asgjë. Jam i kënaqur me skuadrën dhe lojtarët. Më pëlqejnë skuadrat e vogla dhe, nëse dikush vjen, dikush tjetër duhet të largohet.”
