Jose Mourinho ka dorëzuar tashmë raportin e tij te Real Madrid, ku ka përcaktuar repartet që sipas tij kanë nevojë për përforcime. Projekti i portugezit është gati, por për momentin gjithçka ka mbetur pezull për shkak të zgjedhjeve presidenciale në klub.
Marrëveshja mes Florentino Pérez dhe Mourinho raportohet se është e plotë. Trajneri pritet të firmosë për dy sezone, me opsion edhe për një vit të tretë nëse fiton La Liga. Megjithatë, firma finale pritet të vijë vetëm nëse Florentino rizgjidhet president.
Sipas AS, Mourinho nuk ka kërkuar emra konkretë, por ka bërë të qarta pozicionet ku dëshiron ndërhyrje. Ai kërkon një ose dy qendërmbrojtës, një ose dy mbrojtës krahu dhe dy mesfushorë: një me profil defensiv dhe një tjetër më kreativ.
Trajneri portugez e sheh të nevojshëm një mesfushor mbrojtës që mund të konkurrojë me Tchouameni dhe ta zëvendësojë kur duhet. Po ashtu, ai kërkon edhe një lojtar krijues në mesfushë, një profil që sipas tij aktualisht mungon në skuadrën madrilene.
Në fazën e parë, prioritet shihet edhe krahu i djathtë i mbrojtjes, ndërsa një mbrojtës i majtë mund të kërkohet më vonë, sidomos nëse largohet Fran García. Në sulm, hapësirat për ndryshime konsiderohen më të vogla.
Te Real Madrid janë të vetëdijshëm se skuadra ka nevojë për ndryshime, por afrimet e reja do të varen edhe nga largimet. Alaba dhe Carvajal pritet të largohen pasi u përfundojnë kontratat, ndërsa e ardhmja e Ceballos, Camavinga dhe Rüdiger mbetet ende e paqartë.
Plani i Mourinho ishte që të niste punën në Valdebebas në fillim të qershorit, duke bashkëpunuar nga afër me drejtuesit për hyrjet dhe daljet në merkato. Megjithatë, procesi zgjedhor ka vendosur gjithçka në pritje.
