Paris Saint-Germain ka konfirmuar dëmtimin e rëndë të Khvicha Kvaratskhelias, i cili ka pësuar këputje të ligamentit të kryqëzuar anterior në gjurin e djathtë gjatë ndeshjes ndaj Barcelonës.
“Pas këputjes së ligamentit të kryqëzuar anterior në gjurin e djathtë gjatë ndeshjes së djeshme ndaj FC Barcelona, Khvicha Kvaratskhelia do t’i nënshtrohet një ndërhyrjeje kirurgjikale në ditët e ardhshme”, njoftoi PSG.
Sulmuesi gjeorgjian u dëmtua pas një dueli me Xavi Espart dhe u largua nga fusha pa mundur ta mbështeste normalisht këmbën e djathtë. Ekzaminimet e para kishin ngritur menjëherë shqetësime, ndërsa rezonanca magnetike konfirmoi dëmtimin.
PSG nuk ka përcaktuar ende kohën e rikuperimit, por Kvaratskhelia nuk pritet të luajë më gjatë këtij viti dhe ekziston mundësia e madhe që të rikthehet vetëm sezonin e ardhshëm.
Pas dëmtimit, gjeorgjiani publikoi edhe një letër emocionale në Instagram.
“Ka pak kohë që ka ndodhur, por vazhdoj t’i bëj vetes një pyetje: pse pikërisht unë? Mendova se isha gati për gjithçka, por jo për këtë”, shkroi Kvaratskhelia.
“E di se duhet të rikthehem më i fortë për njerëzit e mi, që janë gjithmonë pranë meje. Nuk do t’ju zhgënjej, ju premtoj. Nuk do të kursej asnjë përpjekje. Faleminderit të gjithëve për mbështetjen. Shihemi së shpejti.”
Problemet për Luis Enriquen nuk përfundojnë këtu. Ousmane Dembélé pësoi gjithashtu një dëmtim në kofshën e majtë dhe do të qëndrojë jashtë për disa javë.
Edhe Marquinhos ka pësuar një dëmtim muskulor në kofshën e djathtë dhe, sipas njoftimit të klubit, do të jetë nën trajtim gjatë javëve të ardhshme.
PSG tashmë duhet të vendosë nëse do të kërkojë një zëvendësues për Kvaratskhelian në merkato apo do t’u japë më shumë hapësirë alternativave aktuale në repartin ofensiv.
