Skandalet e përsëritura lidhur me ushqimet e pasigurta në Shqipëri kanë shkaktuar shqetësime të mëdha për shëndetin publik. Ekspertët e shëndetësisë akuzojnë institucionet përkatëse, të cilat duhet të garantojnë kontrollin e produkteve ushqimore para se ato të shiten në treg. Profesori i mikrobiologjisë, Andi Koraqi, deklaron se siguria ushqimore në vend është pothuajse inekzistente dhe se mungesa e kontrollit ka pasoja të rënda për konsumatorët.
Një nga shqetësimet kryesore është pranija e baktereve të rrezikshme si salmonela në mishin e pulës dhe përdorimi i tepruar i antibiotikëve në produktet shtazore.
Dr. Koraqi shpjegon se bakteret mund të përhapen nëse nuk respektohen standardet e higjienës dhe nuk bëhet gatimi në temperatura të mjaftueshme. “Fast food”-et paraqesin një rrezik të veçantë, pasi temperatura e gatimit të mishit nuk është e mjaftueshme për të eliminuar bakterin e salmonelës.
Një tjetër shqetësim është prania e niveleve të larta të antibiotikëve në produktet shtazore si mishi, veza dhe qumështi, si pasojë e përdorimit të medikamenteve në kafshë. Koraqi thekson rëndësinë e rritjes së kontrolleve në farmacitë veterinare dhe përmirësimin e sigurisë ushqimore në nivele më të larta.
Në ndërkohë, importimi i produkteve të rrezikshme, si mishi i kontaminuar nga Brazili dhe luleshtrydhet e mbushura me pesticide nga Greqia, ka kaluar pa reagim nga institucionet përgjegjëse.
