Në Ontario të Jugut, Kanada po pret ministrat e jashtëm të Grupit të Shtatë (G7) për diskutime mbi buxhetin për mbrojtjen, tregtinë dhe pasigurinë rreth planit të armëpushimit të Presidentit amerikan Donald Trump në Gaza, si dhe përpjekjet për t’i dhënë fund luftës mes Rusisë dhe Ukrainës. Ministrja e Jashtme e Kanadasë, Anita Anand, mirëpriti homologët e saj nga SHBA, Britania e Madhe, Franca, Gjermania, Italia dhe Japonia në takimin e zhvilluar të martën dhe të mërkurën.
Pjesëmarrësit e tjerë përfshinin Shefen e Politikës së Jashtme të BE-së, Kaja Kallas, si dhe ministrat e jashtëm nga Australia, Brazili, India, Arabia Saudite, Meksika, Koreja e Jugut, Afrika e Jugut dhe Ukraina. Rubio theksoi se “po shqyrtojmë një gamë çështjesh kritike me fokus të veçantë tek sigurimi i amerikanëve.”
Marrëdhëniet e tensionuara për shkak të tarifave të Trumpit kanë karakterizuar detyrat e Kanadasë si nikoqire të G7. Tensionet u përshkallëzuan pasi Trump ndaloi bisedimet tregtare me Kanadanë për shkak të një reklame të qeverisë provinciale në Ontario që e irritoi atë. Kryeministri kanadez, Mark Carney, kërkoi falje dhe shprehu gatishmërinë për të rinisur bisedimet kur SHBA-të janë të gatshme.
Anand theksoi se do të takohet me Rubio, por një ministër tjetër udhëheq dosjen tregtare amerikane. Trump ka vendosur prioritete të ndryshme në raport me politikën tregtare të vendeve aleate se sa në bashkëpunimin e G7.
Një tjetër çështje e rëndësishme është financimi për mbrojtjen. Të gjithë anëtarët e G7, përveç Japonisë, janë anëtarë të NATO-s, dhe Trump ka kërkuar që aleatët të shpenzojnë 5% të PBB-së së tyre për mbrojtjen. Kanada ka premtuar se do të arrijë këtë nivel deri në vitin 2035.
Në lidhje me situatën në Gaza, Britania e Madhe, Kanada dhe Franca kanë shpallur se do të njohin një shtet palestinez, pavarësisht nga zgjidhja e konfliktit, çka ka shkaktuar debata në brendësi të G7. Po ashtu, takimi i diplomatëve parashikon mbështetje për Ukrainën, përfshirë 13 milionë paund për ndihmë humanitare dhe riparimin e infrastrukturës energjitike, ndërsa Rusia vazhdon sulmet në këtë vend.
