Në një zhvillim që duket sikur ka dalë nga një thriller hollivudian, themeluesi i Telegram-it, Pavel Durov, ka ofruar të blejë bizhuteritë e vjedhura nga Luvri – por në vend që t’i kthejë në Paris, ai dëshiron t’i dërgojë në Luvër në Abu Dhabi.
Miliarderi rus i teknologjisë nuk u përmbajt në komentet e tij, duke deklaruar se thesaret “do të ishin shumë më të sigurta në Emiratet e Bashkuara Arabe sesa në Francën e pa mbrojtur.”
Deklaratat e tij vijnë pas grabitjes së guximshme në mes të ditës të dielën, kur katër persona ende të paidentifikuar realizuan një nga vjedhjet më të mëdha të viteve të fundit – duke zhdukur bizhuteri me vlerë miliona euro dhe pa lënë asnjë gjurmë.
Ndërsa autoritetet franceze po përpiqen të zbulojnë se kush qëndron pas kësaj ngjarjeje, Durov tha se nuk ishte aspak i befasuar:
“Kjo është një tjetër shenjë e rënies së një vendi që dikur ishte i madh,” – tha ai, duke akuzuar qeverinë franceze se “po shpik kërcënime imagjinare për të shmangur ato reale.”
