Milan ka pësuar një tjetër goditje të rëndë në garën për një vend në Champions League. Kuqezinjtë u mundën 2-0 nga Sassuolo në “Mapei Stadium”, në një ndeshje ku skuadra e Massimiliano Allegri u shfaq pa ide, pa ritëm dhe pa karakter.
Sassuolo e nisi ndeshjen shumë më mirë dhe kaloi në avantazh që në minutën e 5-të. Thorstvedt fitoi duelin me Jashari dhe shërbeu për Laurienté, i cili më pas gjeti Berardi në krah. Sulmuesi italian goditi saktë me të majtën dhe mposhti Maignan për 1-0.
Milan protestoi për një kontakt në nisje të aksionit, por arbitri Maresca lejoi lojën të vazhdonte. Vetëm pak minuta më vonë, Sassuolo ishte sërish pranë golit, ndërsa Milan dukej në vështirësi të madhe, i ngadaltë në qarkullimin e topit dhe i pambrojtur ndaj kundërsulmeve të shpejta të vendasve.
Kuqezinjtë patën shumë pak raste të vërteta. Nkunku kërkoi një penallti, por pa sukses, ndërsa Leao shpërdoroi një mundësi të mirë, duke goditur jashtë me të majtën. Këto mbetën praktikisht momentet më të rrezikshme të Milan në pjesën e parë.
Situata u përkeqësua në minutën e 24-t, kur Tomori, i ndëshkuar më parë me karton të verdhë, ndërhyri gabimisht nga pas ndaj Laurienté në mesfushë. Kartoni i dytë i verdhë la Milan me dhjetë lojtarë për më shumë se një orë lojë.
Në pjesën e dytë, Sassuolo e mbylli praktikisht ndeshjen shumë shpejt. Në minutën e 47-të, Laurienté shënoi golin e dytë me një goditje të fortë pranë shtyllës së parë, duke mposhtur sërish Maignan.
Pas golit të dytë, Milan u zhduk nga fusha. Sassuolo kontrolloi lojën dhe pati mundësi për të thelluar rezultatin, ndërsa kuqezinjtë nuk arritën të reagonin. Statistika më shqetësuese për Milan ishte se skuadra nuk regjistroi asnjë goditje në portë.
Forma e Milan është alarmante: vetëm 16 gola në 16 ndeshje në pjesën e dytë të sezonit dhe vetëm një gol në pesë ndeshjet e fundit. Sulmuesit nuk kanë shënuar që nga 1 marsi, por problemi duket më i thellë se forma individuale e lojtarëve.
Allegri provoi të ndryshonte diçka me aktivizimin e Loftus-Cheek, Gimenez dhe Pulisic, ndërsa Leao u zëvendësua dhe u fishkëllye sërish. Megjithatë, ndryshimet nuk sollën efekt.
Me këtë humbje, Milan mbetet në kuotën e 67 pikëve dhe tashmë rrezikon seriozisht vendin në zonën Champions. Kuqezinjtë kanë nevojë për gjashtë pikë në tre ndeshjet e fundit për të siguruar kualifikimin në top katërshe, ndërsa presioni po rritet gjithnjë e më shumë.
Nga ana tjetër, Sassuolo ngjitet përkohësisht në kuotën e 49 pikëve, duke iu bashkuar Bologna në vendin e tetë.
