Joao Cancelo po përjeton një rilindje në karrierën tij pas transferimit tek Al Hilal. Transferimi në ligën saudite ngriti dyshime për vazhdimësinë e tij në nivelin më të lartë, por portugezi ka treguar se është ende një mbrojtës i klasit botëror.
Performancat në skuadrën arabe kanë qenë të jashtëzakonshme, duke treguar shkathtësinë, cilësinë sulmuese dhe qëndrueshmërinë e tij mbrojtëse, gjë që ka ngjallur edhe një herë interesin e disa klubeve evropiane për tregun e ardhshëm të transferimeve.
I pari në listë është Manchester United, “Djajtë” po kalojnë një nga sezonet më të këqija të viteve të fundit. Amorim beson se mbrojtja ka nevojë për përforcime urgjente dhe e sheh Cancelo-n si një opsion ideal për të forcuar krahun e djathtë, ku skuadra e tij ka vuajtur vazhdimisht.
Një tjetër klub që po monitoron me vëmendje mbrojtësin portugez është edhe Milan-i. Kuqezinjtë aktualisht kanë Kyle Walker në radhët e tyre në formë huazimi, por nëse nuk janë në gjendje të sigurojnë anglezin për sezonin e ardhshëm, Cancelo do të ishte një alternativë kryesore për të forcuar mbrojtjen e tyre.
Së fundi, në garë për lojtarin ka hyrë edhe Aston Villa. Unai Emery po ndërton një ekip konkurrues me aspirata serioze në Premier League dhe beson se Cancelo mund të jetë një pjesë kyçe në projektin e tij ambicioz.
