Pika Kufitare e Morinës po përjeton një fluks të lartë udhëtarësh këtë fundjavë, ndërsa mijëra qytetarë nga Kosova po hyjnë në Shqipëri për pushimet verore.
Sipas të dhënave zyrtare, në 24 orët e fundit mes dy vendeve kanë hyrë dhe dalë 26.921 persona me rreth 8.022 automjete. Në Shqipëri kanë hyrë 14.564 qytetarë me 4.233 makina, ndërsa kanë dalë 12.357 qytetarë me 3.899 automjete.
Destinacioni kryesor i pushuesve mbetet bregdeti shqiptar, ku shumë prej tyre kanë zgjedhur të kalojnë fundjavën ose të nisë sezonin veror.
Për të përballuar fluksin e shtuar, pika kufitare po operon me 12 sportele hyrje-dalje. Procedurat e përshpejtuara, të mundësuara nga marrëveshja e lëvizjes së lirë mes Shqipërisë dhe Kosovës, po sigurojnë kalim më të shpejtë dhe pa radhë të gjata.
