Ish-Zonja e Parë e SHBA-së, Michelle Obama, ka mohuar zërat që qarkullojnë së fundmi për një krizë martesore me bashkëshortin e saj, ish-Presidentin, Barack Obama.
Në një intervistë për podcastin “Work in Progress” me aktoren Sophia Bush, Michelle vendosi të flasë hapur për mungesën e saj në disa ngjarje të rëndësishme publike dhe spekulimet që kanë lindur për një divorc të mundshëm.
“Nuk jam zhdukur. Thjesht kam zgjedhur të kujdesem për mirëqenien time,” tha Michelle, duke theksuar se vendimet e saj personale nuk kanë të bëjnë me ndonjë problem në martesë.
Ajo mungoi në disa evente të profilit të lartë, përfshirë varrimin e ish-Presidentit Jimmy Carter dhe inaugurimin e Donald Trump në fillim të vitit 2025, çka ndezi thashetheme në media dhe rrjete sociale.
“Është e vështirë për gratë të vendosin për veten pa u gjykuar. Në këtë fazë të jetës sime, dua të jem më e vetëdijshme për zgjedhjet që më sjellin qetësi dhe kënaqësi,” u shpreh ajo.
Ndërkohë, Barack Obama ka pranuar se koha në Shtëpinë e Bardhë nuk ishte e lehtë për martesën e tyre, por të dy kanë qenë të përkushtuar për ta ruajtur lidhjen dhe për të punuar vazhdimisht në të.
“Jemi bashkë në këtë udhëtim. Ashtu si çdo çift, kemi pasur sfidat tona, por mbështetja dhe përkushtimi ndaj njëri-tjetrit nuk ka munguar,” është shprehur ai më herët.
