Teksa seanca e sotme plenare shoqërohej mes tensionit dhe përplasjeve, jashtë ambjenteve të Kuvendit u mbajt një protestë nga mësuesit me moton për “depolitizim të arsimit” dhe për kërkesa të tjera.
Dy kërkesat kryesore janë rikthimin e pagës së 13-të dhe ndalimin e diferencimin në rroga mes arsimtarëve që janë diplomuar para dhe pas sistemit të Bolonjës. Mësuesit e sistemit parauniversitar kanë kërkuar nga autoritetet paga të barabarta, dhe shmangien e diferencimeve ndaj mësuesve për çështjen e pagave.
“Ne Sindikata e bashkuar e Arsimit Shqiptar jemi sot përpara parlamentit të Shqipërisë, me qëllim që ti kërkojmë deputetëve të çdo krahu politik të mbështesë mësuesit. Numri i mësuesve të prekur nga diplomat është mbi 11 mijë dhe ndjeshmëria duhet të ishte edhe më e madhe”, u shpreh Alma Lama para mësuesve të mbledhur para Kuvendit.
“Me paga 700-800 mijë lekëshe do të hyjmë në bashkimin Evropian? Vetë e kanë deklaruar që minimumi i pagës së shtresës së mesme duhet të jetë 1 milion e gjysmë (të vjetra). E kemi gjysmë për gjysmë”, u shpreh Marina Llozhi, mësuese prej 40 vitesh në arsimin shqiptar.
Ajo tha për Citizens.al se rritja e pagës, e kryer një vit më parë nuk justifikon ngarkesën që mësuesit kanë. Në protestën e thirrur nga Sindikata e Bashkuar e Arsimit Shqiptar u mblodhën dhjetëra mësues nga qytete të ndryshme të Shqipërisë, ndërsa pjesë ishin edhe deputetë të opozitës dhe aktivistë. Ina Zhupa, deputete e Partisë Demokratike, tha në fjalën e saj në protestë se mësuesit kanë të drejtë të marrin pagën e 13-të. Zhupa theksoi ndër të tjera se do të vazhdojë angazhimin e saj për të garantuar kushte më të mira pune për mësuesit.
