Merkato në Serie A vazhdon të sjellë lëvizje të mëdha dhe emra të bujshëm në qendër të vëmendjes.
Një nga historitë më intriguese të verës ka qenë tentativa e Napolit për të marrë Pio Espositon, talentin e ri të Interit.
Presidenti Aurelio De Laurentiis kishte ofruar deri në 45 milionë euro, por zikaltërit nuk pranuan as të uleshin në bisedime. Për Interin, sulmuesi 19-vjeçar që shkëlqeu sezonin e kaluar me Spezian është i pashitshëm.
Edhe ofertat nga Atalanta (40 milionë) dhe Newcastle (50 milionë) janë refuzuar, me klubin që e sheh si një gur të rëndësishëm për të ardhmen.
Napoli kërkon zëvendësues për Lukakun
Në anën tjetër, Napoli duhet të gjejë një zëvendësues për Romelu Lukakun, i cili do të qëndrojë jashtë fushave për muaj të tërë pas dëmtimit në kofshë. Në listën e alternativave janë emra si Zirkzee, Højlund dhe më së fundi Dovbyk, që duket të jetë pista më e nxehtë në këtë moment.
“Efekti domino” mes portierëve
Ndërkohë, verën e futbollit europian mund ta ndryshojë edhe “efekti domino” mes portierëve. E ardhmja e Gianluigi Donnarummas te PSG është në dyshim pas prishjes së raporteve me klubin dhe ardhjes së Chevalier. Një kalim i mundshëm në Premier League do të hapte lojën për lëvizje të tjera, ku përmendet edhe Yann Sommer i Interit si një opsion për Galatasarayin, edhe pse zikaltërit kërkojnë të paktën 4 milionë euro.
Marseille surprizon me Rabiot, Tare futet në garë
Në Francë, Olympique Marseille ka tronditur merkaton duke nxjerrë në shitje Adrien Rabiot pas një konflikti të ashpër në dhomat e zhveshjes. Mesfushori francez, bashkë me shokun e skuadrës Jonathan Rowe, është përjashtuar dhe tashmë është në listën e transferimeve.
Menjëherë pas këtij lajmi, Igli tare ka shfaqur interes për shërbimet e mesfushorit francez, i cili me eksperiencën e mëparshme që ka pasur me Allegrin, mund të ndihmojë Milanin.
Roma merr Bailey, Milani shkurton organikën
Lëvizje ka edhe në Serie A: Roma ka zyrtarizuar ardhjen e Leon Bailey nga Aston Villa, në huazim me të drejtë blerjeje. Jamajkani është lojtari i parë nga vendi i tij që vesh fanellën verdhekuqe. Ndërsa Milan vijon të shkurtojë organikën: pas largimit të Okafor, tashmë Yunus Musah ka përfunduar në shënjestrën e Atalantës, që ka ofruar rreth 25 milionë euro për kartonin e tij.
Juventusi pret goditjen e madhe
Në horizontin e fundit të verës, edhe Juventusi pret goditjen e madhe: sulmuesi Randal Kolo Muani mbetet i qetë dhe i bindur se do të zbarkojë në Torino përpara mbylljes së merkatos.
