Kryetari i PD-së, Sali Berisha u bëri thirrje nxënësve dhe studentëve që bojkotojnë mësimin dhe të futen në grevë për mbylljen e Tik Tokut nga qeveria Rama. E cilësoi akt të pastër censure. Sipas tij, Rama po kërkon të “varë Tik Tokun në sheshin Skënderbej” sepse në këtë platformë e kritikojnë dhe nuk arrin t’i kontrollojnë.
“Protesta e nxënësve e studentëve dhe të rinjve në datë 15 do të jetë më bukura që ka parë Shqipëria deri më sot. Protesta kundër censurës. Pavarësisht nga mosha, ju, të rinjtë bëheni luftëtarë kundër narko-diktaturës së Ramës. Kam edhe një thirrje tjetër, të fillojë bojkoti i mësimeve. Po. Ia vlen. Të dashur të rinj dhe të reja ai që u vendos censurën shkelmon mbi të ardhmen tuaj.
Për të mbrojtur…nuk është problemi i Tik Tokut, që është mjeti më modern i komunikimit, por i censurës. Ju keni të drejtë të grevat dhe greva juaj është të bojkotoni mësimet, që ditën e hënë. Do të ishte madhështore të mungoni sa më shumë në orën e parë. U bëj thirrje prindërve të mos i dërgojnë fëmijët ditën e hënë në shkollë në orën e parë, si një akt i betejës së fëmijëve tuaj kundër censurës” tha ai.
