Manchester United mund të përforcojë repartin e mbrojtjes me një talent të dalë nga akademia e Barcelona.
Sipas “TEAMtalk”, drejtuesit e klubit anglez po përgatiten të hyjnë në negociata me Barcelona për mbrojtësin e majtë katalanas, Alejandro Balde.
“Djajtë e Kuq” kanë nevojë për një mbrojtës të ri të majtë, ndërsa situata financiare e Barcelona mund të favorizojë një marrëveshje të mundshme. Klubi katalanas mund të detyrohet të shesë disa lojtarë për të lehtësuar buxhetin dhe faturën e pagave, një situatë që Manchester United kërkon ta shfrytëzojë.
Sipas burimit, Barcelona nuk është gati të heqë dorë nga Balde për më pak se 50 milionë euro, një shifër që nuk pritet të jetë problem për klubin anglez.
Balde është produkt i akademisë së famshme të Barcelona dhe një transferim në “Old Trafford” mund të ishte lëvizja e parë e madhe në karrierën e tij.
Këtë sezon, 22-vjeçari ka zhvilluar 38 paraqitje me Barcelona, duke dhënë 3 asistime. Kontrata e tij me klubin katalanas është e vlefshme deri në vitin 2028, ndërsa vlera e tij në treg, sipas “Transfermarkt”, llogaritet rreth 55 milionë euro.
