Manchester City po përgatitet për një largim të mundshëm të Pep Guardiola pas ndeshjes së fundit të sezonit në Premier League ndaj Aston Villa.
Sipas BBC Sport, burime pranë klubit besojnë se trajneri spanjoll pritet të largohet nga Etihad në fund të sezonit, edhe pse City thekson se Guardiola ka ende kontratë edhe për sezonin e ardhshëm dhe shpreson që ai të qëndrojë.
Brenda klubit ka nisur puna për skenarin e largimit të tij, ndërsa edhe disa pjesëtarë të skuadrës thuhet se presin që Guardiola të largohet pas sfidës ndaj Aston Villa. Klubi po mendon gjithashtu mënyrën se si do të nderojë një nga periudhat më të suksesshme në historinë e tij.
Favorit për ta zëvendësuar është Enzo Maresca, ish-trajneri i Chelsea, i cili më parë ka punuar me Guardiola te Manchester City.
Guardiola ka fituar 17 trofe të mëdhenj me City, përfshirë gjashtë tituj të Premier League, Champions League, tre FA Cup dhe pesë EFL Cup gjatë dhjetë viteve të tij në klub.
Pavarësisht spekulimeve të shumta, vetë Guardiola ka përsëritur se ka ende kontratë. Para finales së FA Cup, ai deklaroi se ka “edhe një vit” në marrëveshjen e tij dhe se për momentin është ende trajner i Manchester City.
Megjithatë, në Angli raportojnë se përgatitjet për një lamtumirë të mundshme tashmë kanë nisur, duke e bërë të ardhmen e Guardiola një nga çështjet më të mëdha të fundit të sezonit.
