Trajneri i PSG, Luis Enrique, ka folur hapur për mungesën e motivimit te skuadra e tij, pas barazimit 2-2 ndaj Lorient në Ligue 1, pak ditë para përballjes së madhe me Bayern Munich në Champions League.
Pas ndeshjes, tekniku spanjoll pranoi se nuk është e lehtë për lojtarët të rikthehen menjëherë te kampionati pas një sfide kaq të rëndësishme europiane.
“Është e vështirë të kthehesh te kampionati pas një ndeshjeje kaq të rëndësishme dhe me një atmosferë fantastike. Nga ana motivuese, është një sfidë. Ky rezultat është zhgënjyes, sepse na duheshin vërtet tre pikët”, u shpreh Luis Enrique në konferencën për shtyp.
PSG nuk shkoi më shumë se një barazim 2-2 ndaj Lorient, skuadër që renditet në vendin e nëntë në Ligue 1. Luis Enrique vendosi të pushojë disa nga titullarët kryesorë, duke lënë jashtë Ousmane Dembélé, Khvicha Kvaratskhelia dhe Marquinhos, ndërsa Warren Zaire-Emery u aktivizua nga stoli.
“Ne hodhëm në fushë vetëm dy lojtarë që kishin luajtur titullarë të martën në mbrëmje. U përpoqëm ta kontrollonim lojën ashtu siç dëshironim. Donim të fitonim, por e humbëm atë mundësi”, tha trajneri i PSG.
Për parisienët shënuan Ibrahim Mbaye në minutën e 6-të dhe Zaire-Emery në minutën e 62-të, ndërsa për Lorient realizuan Pablo Pagis dhe Aiyegun Tosin.
Me këtë rezultat, PSG humbi mundësinë për ta siguruar titullin kampion tre javë para fundit. Megjithatë, skuadra e Luis Enrique vazhdon të ketë një avantazh prej gjashtë pikësh ndaj Lens, që gjithashtu barazoi 1-1 me Nice.
Pavarësisht barazimit, Luis Enrique nuk deshi të kritikojë lojtarët e tij. Sipas tij, skuadra bëri detyrën në aspektin e përkushtimit, por u ndëshkua nga dy raste të kundërshtarit.
“Të paktën për sa i përket përpjekjes, e bëmë mirë punën tonë. Ata shënuan dy gola nga dy sulme”, deklaroi spanjolli.
Tani vëmendja e PSG kalon e gjitha te Champions League. Kampionët francezë do të udhëtojnë në “Allianz Arena” për ndeshjen e kthimit gjysmëfinale ndaj Bayern Munich, ku mbërrijnë me avantazhin 5-4 nga takimi i parë.
Megjithatë, PSG do të ketë një mungesë të rëndësishme, pasi Achraf Hakimi nuk do të jetë i gatshëm për këtë sfidë, pas dëmtimit në kofshë të pësuar në ndeshjen e parë.
