Liverpool nuk arrin të ndalet në krizën e rezultateve, duke pësuar humbjen e katërt radhazi në Premier League. Në “Anfield”, Manchester United triumfoi 2-1 falë një goli vendimtar të Harry Maguire në minutën e 84-të.
Takimi nisi në mënyrën më të mirë për “Djajtë e Kuq”, me Bryan Mbeumo që shënoi që në sekondën e 60-të. Liverpool reagoi me vonesë dhe arriti të barazojë në minutën e 78-të me Cody Gakpo, i cili më parë kishte goditur shtyllën tre herë. Megjithatë, vetëm pak minuta më vonë, Maguire u ngjit më lart në zonë dhe me kokë i dha ekipit të Ruben Amorim fitoren e madhe në Anfield.
Kjo është hera e parë që trajneri portugez Ruben Amorim arrin dy fitore radhazi në Premier League që prej ardhjes në stolin e United.
Liverpool ndërkohë po shfaq shenja të forta rënieje. Mohamed Salah, lideri i skuadrës, vazhdon të zhgënjejë me paraqitjet e tij, duke humbur raste të pastra dhe duke mos arritur të justifikojë kontratën e re milionere.
Me këtë humbje, Liverpool bie gjithnjë e më shumë pas Arsenalit kryesues dhe gjendet tashmë po aq larg Evertonit sa edhe majës së tabelës – një statistikë që tregon se sezoni i Arne Slot është futur në një spirale presioni të madh.
