Bayern Munich ka marrë një lajm shumë pozitiv në prag të përballjes së madhe me Real Madridin në Champions League. Sipas raportimit të Mundo Deportivo, sulmuesi anglez Harry Kane pritet të mungojë në ndeshjen e Bundesligës ndaj Freiburgut, por ka shumë gjasa të jetë i gatshëm për sfidën europiane ndaj madrilenëve.
Edhe trajneri i Bayernit, Vincent Kompany, ka konfirmuar se Kane nuk do të luajë nesër, por shanset janë shumë të mëdha që ai të jetë në fushë më 7 prill. Kjo është një shtysë e rëndësishme për skuadrën gjermane, duke ditur peshën që ka anglezi në repartin ofensiv.
Harry Kane pësoi një dëmtim muskulor gjatë grumbullimit me kombëtaren e Anglisë, çka e la jashtë fushave për më shumë se një javë. Megjithatë, rikuperimi i tij duket se po ecën mirë dhe Bayerni shpreson ta ketë në dispozicion pikërisht për ndeshjen më të rëndësishme.
Deri tani këtë sezon, Kane ka zhvilluar 40 ndeshje, ka shënuar 48 gola dhe ka dhënë 5 asistime. Në Champions League, ai renditet aktualisht i treti në listën e golashënuesve me 10 gola, po aq sa Anthony Gordon i Newcastle, ndërsa në krye ndodhet Erling Haaland me 13 gola.
