Pas publikimit të gjashtë emrave të parë që po përfliten si banorë të mundshëm të “Big Brother VIP Albania 6”, një prej tyre duket se ka tërhequr veçanërisht vëmendjen e produksionit. Bëhet fjalë për deputetin socialist Erion Braçe.
Sipas informacioneve që po qarkullojnë së fundmi, moderatori Ledion Liço thuhet se dëshiron që Braçe të bëhet pjesë e edicionit të gjashtë të spektaklit.
Një nga arsyet lidhet me karakterin e drejtpërdrejtë të deputetit dhe qëndrimet e tij në debatet publike. Pjesëmarrja e një politikani aktiv në një format si “Big Brother VIP” do të ishte një eksperiencë ndryshe si për vetë Braçen, ashtu edhe për publikun.
Por, përtej karakterit të tij, në rrjet po përflitet edhe një arsye tjetër që mund ta bëjë pjesëmarrjen e deputetit veçanërisht interesante për produksionin.
Bëhet fjalë për një përballje të mundshme me Monika Kryemadhin, e cila ishte opinioniste në edicionin e pestë dhe është përfolur për rikthimin në të njëjtin rol edhe këtë sezon.
Nëse të dy do të bëheshin pjesë e formatit, Braçe si banor dhe Kryemadhi si opinioniste, debatet mes tyre gjatë spektakleve mund të sillnin situata interesante, duke marrë parasysh qëndrimet dhe përplasjet e tyre të mëparshme në politikë.
Emri i Erion Braçes u përmend fillimisht nga gazetari Bledi Mane gjatë një interviste në Top Albania Radio, më 25 shtator. Mane e propozoi deputetin si një personazh që do të dëshironte ta shihte brenda shtëpisë më të famshme në Shqipëri.
Ndërkohë, Monika Kryemadhi ka shprehur së fundmi dëshirën për t’u rikthyer në rolin e opinionistes, megjithëse ka sqaruar se vendimi përfundimtar i takon produksionit.
Megjithatë, informacionet se Ledion Liço po kërkon me çdo kusht pjesëmarrjen e Braçes mbeten të pakonfirmuara. Nuk dihet nëse deputeti ka marrë një ftesë konkrete dhe nëse do të ishte i gatshëm të pranonte një angazhim të tillë.
Për momentin, as pjesëmarrja e Erion Braçes dhe as rikthimi i Monika Kryemadhit si opinioniste nuk janë konfirmuar zyrtarisht nga Top Channel.
