Kryeministri i Grenlandës, Mute Egede, deklaroi të premten se është i gatshëm të bisedojë me Presidentin e sapozgjedhur të SHBA-ve, Donald Trump, i cili ka shprehur interes për të marrë kontrollin e ishullit arktik. Ai gjithashtu bëri thirrje për respektimin e aspiratave të pavarësisë së Grenlandës.
Trump, i cili merr detyrën më 20 janar, e ka përshkruar kontrollin e SHBA-së mbi Grenlandën, një territor gjysmë-autonom të Danimarkës, si një “domosdoshmëri absolute”. Ai nuk përjashtoi përdorimin e mjeteve ushtarake apo ekonomike, përfshirë tarifat kundër Danimarkës.
Në një konferencë për shtyp në Kopenhagë, kur u pyet nëse kishte pasur kontakt me Trump-in, Egede u përgjigj: “Jo, por jemi të gatshëm të bisedojmë.”
Kryeministrja e Danimarkës, Mette Frederiksen, e cila gjithashtu mori pjesë në konferencë, tha një ditë më parë se kishte kërkuar një takim me Trump-in, por nuk priste që ai të ndodhte para inaugurimit të tij.
Grenlanda, që ka 57,000 banorë, ishte një koloni daneze deri në vitin 1953, por tani është një territor autonom nën sovranitetin e Danimarkës. Në vitin 2009, ajo fitoi të drejtën për të shpallur pavarësinë përmes një referendumi.
Shtetet e Bashkuara mbajnë një bazë ushtarake në pjesën veriore të këtij territori strategjikisht të rëndësishëm.
Egede theksoi aspiratat e Grenlandës, duke thënë: “Ne kemi dëshirë për pavarësi, dëshirë për të qenë zotër të shtëpisë sonë … Kjo është diçka që të gjithë duhet ta respektojnë.”
Megjithatë, ai shtoi: “Kjo nuk do të thotë se po ndërpresim të gjitha lidhjet, gjithë bashkëpunimin dhe marrëdhëniet me Danimarkën.”
Lëvizja për pavarësi ka fituar mbështetje të madhe në vitet e fundit, çështje që Egede e trajtoi edhe në fjalimin e tij për Vitin e Ri.
