Çmimet e naftës u rritën ndjeshëm këtë të hënë, pasi presidenti amerikan Donald Trump hodhi poshtë publikisht përgjigjen e Iranit ndaj propozimit amerikan për përfundimin e luftës në Lindjen e Mesme. Përmes platformës Truth Social, Trump e cilësoi përgjigjen iraniane si “plotësisht të papranueshme”.
“Sapo lexova përgjigjen nga të ashtuquajturit ‘përfaqësues’ të Iranit. Nuk më pëlqen, është krejtësisht e papranueshme !” tha Trump.
Menjëherë pas deklaratës së tij, tregjet reaguan dhe çmimi i naftës Brent të Detit të Veriut arriti mbi 104 dollarë për fuçi, me një rritje prej më shumë se 3%. Investitorët druhen se ngërçi diplomatik po largon mundësinë e hapjes së shpejtë të Ngushticës së Hormuzit, një pikë kyçe nga ku kalon rreth 20% e naftës botërore.
Bisedimet SHBA-Iran në krizë
Më shumë se një muaj pas armëpushimit të shpallur në rajon, negociatat mes SHBA-së dhe Iranit duket se kanë hyrë në rrugë pa dalje. Teherani konfirmoi se i ka dorëzuar Uashingtonit përgjigjen e tij përmes Pakistanit, por pa bërë publike detajet.
Sipas mediave iraniane, propozimi përfshin fundin e luftës në të gjitha frontet, garanci sigurie për lundrimin detar, hapje graduale të Ngushticës së Hormuzit dhe lehtësim të bllokadës amerikane ndaj porteve iraniane.
Netanyahu: Lufta nuk ka përfunduar
Kryeministri izraelit Benjamin Netanyahu deklaroi se ende mbetet për t’u çmontuar infrastruktura iraniane e pasurimit të uraniumit. Në një intervistë për CBS News, ai tha se Izraeli dhe SHBA “kanë arritur shumë”, por paralajmëroi se konflikti “nuk ka mbaruar”.
Sulme me dronë në Gjirin Persik
Tensionet u shtuan edhe më shumë pas raportimeve për sulme të reja me dronë në Gjirin Persik. Një anije mallrash pranë Katarit u godit nga një dron, ndërsa incidente të tjera u raportuan në Kuvajt dhe Emiratet e Bashkuara Arabe.
Presidenti iranian Masoud Pezeshkian deklaroi se vendi i tij “nuk do të dorëzohet kurrë”, duke theksuar se dialogu nuk nënkupton tërheqje apo kapitullim.
