Komisionerja për Zgjerim në BE, Marta Kos, në konferencën e përbashkët për mediat në Luksemburg me kryeministrin Edi Rama dhe ministrin e Jashtëm të Polonisë, Radosław Sikorski, vlerësoi progresin e Shqipërisë në rrugën drejt BE.
Ajo tha se synohet që brenda këtij viti të hapen të gjithë grupkapitujt, e brenda vitit që vjen të mbyllen, në mënyrë që anëtarësimi i Shqipërisë në BE të ndodhë sa më parë.
“Shqipëria është histori suksesi, në proces. Zhvillimi i sotëm është më i vlefshësm se sa ti shtosh thjeshtë BE-së një vend më tepër. Ky i sotmi është njëri nga shumë prej premtimeve të këtij viti. Shpresojmë që brenda vitit të çelim të gjithë grupkapitujt negociues dhe vitin tjetër t’i mbyllim të gjitha”, tha Kos.
Më tej komisionerja e BE theksoi se nëse Shqipëria i plotëson të gjitha kushtet dhe reformat ajo do të jetë avokatka kryesore që vendi ynë në 2030-ën të jetë vend anëtar i Bashkimit Europian.
