Forcat Operacionale të Drejtorisë së Përgjithshme të Burgjeve (DAP) kanë ndërmarrë një operacion të papritur në burgun e sigurisë së lartë në Peqin, në orët e para të mëngjesit të së shtunës.
Kontrollet janë zhvilluar në të gjitha ambientet e institucionit, përfshirë edhe qelitë e të dënuarve, si pjesë e një aksioni të gjerë për forcimin e sigurisë së brendshme.
Sipas raportimeve, gjatë kontrolleve në disa qeli janë zbuluar dhe sekuestruar sasi të dyshuara të lëndës narkotike, që dyshohet të jetë kokainë. Paralelisht me këtë operacion, në kuadër të masave administrative dhe të sigurisë, janë realizuar edhe transferimet e dy të dënuarve me burgim të përjetshëm, identiteti i të cilëve nuk është bërë publik.
Operacioni është zhvilluar me një angazhim të shtuar të forcave dhe përdorimin e mjeteve speciale, me urdhër të drejtorit të përgjithshëm të burgjeve. Deri më tani, autoritetet nuk kanë dhënë detaje shtesë mbi arsyet e ndërhyrjes apo mbi rezultatet përfundimtare të kontrolleve të kryera në këtë institucion.
