Edhe Bayern Munich është i vetëdijshëm për një dobësi që po i kushton shpesh: goditjet standarde. Ish-ylli i bavarezëve, Toni Kroos, e theksoi këtë problem në episodin e ri të podcast-it të tij “Einfach mal Luppen”, duke vënë në dukje se ekipi po pëson shumë gola nga këto situata.
Fituesi i Botërorit 2014 u shpreh: “Nga ajo që kam parë së fundmi te Bayern, duket sikur kanë pësuar shumë gola nga goditjet standarde.” Kroos paralajmëroi se kjo mund të kthehet në rrezik real, sidomos në fazat me eliminim të Champions League, ku çdo detaj vendos ndeshjet. “Nuk e shoh ende Atalantën si pengesë, por kur vijnë ndeshjet me Cityn dhe Realin më vonë… është e vërtetë që sot shumë ndeshje vendosen nga goditjet standarde,” shtoi ai.
Statistikat e konfirmojnë shqetësimin: në të gjitha kompeticionet, Bayern ka pësuar 14 gola direkt nga goditjet standarde – 10 në Bundesligë, 3 në Kupën e Gjermanisë dhe 1 në Champions League.
Trajneri i Bayern, Vincent Kompany, reagoi një ditë para ndeshjes së Bundesligës ndaj Gladbach (e premte, ora 20:30), duke pranuar se kritika e Kroos ka bazë. “Është fakt që nuk jemi perfektë. Punojmë çdo ditë për të krijuar një version më të mirë të Bayern,” tha belgu.
Sipas raportimeve, problemi u bë veçanërisht i theksuar në nëntor 2025: kundër Union Berlin, Bayern pësoi të dy golat nga goditje këndi; ndërsa në fitoren 6-2 ndaj Freiburg, bavarezët u gjendën në disavantazh 0-2, sërish pas dy goditjeve këndi. Edhe në humbjen 1-3 ndaj Arsenal, Bayern pësoi një gol nga një situatë standarde, pas një aksioni ku Manuel Neuer u bllokua.
Kompany kujtoi se kjo çështje ishte diskutuar vazhdimisht për një periudhë, por jo në muajt e fundit: “Kishim një fazë ku flitej për këtë pothuajse çdo ditë, pyetjet përsëriteshin çdo javë – por jo në tre ose katër muajt e fundit. Shumicën e golave nga standardet i pësuam pikërisht në atë periudhë. Tani u rikthye sërish si temë sepse pësuam një të tillë kundër Dortmund.”
Megjithatë, Kompany theksoi edhe një tjetër aspekt që, sipas tij, po anashkalohet: Bayern është shumë i fortë në standarde në aspektin ofensiv. “Besoj se në përgjithësi jemi në rrugën e duhur në këtë fazë të fundit. Një statistikë është lënë pas dore: ne jemi një nga ekipet më të mira në Evropë ofensivisht sa i përket goditjeve standarde. Duam të përmirësohemi edhe më shumë, por kemi bërë progres dhe do të vazhdojmë,” përfundoi ai.
