Jürgen Klopp është prezantuar zyrtarisht si trajneri i ri i kombëtares gjermane, duke marrë vendin e Julian Nagelsmann pas eliminimit të Gjermanisë në fazën e 1/16-ave të Kupës së Botës.
Ish-trajneri i Liverpoolit dhe Borussia Dortmundit ka firmosur deri në përfundimin e Botërorit 2030 dhe synon ta rikthejë katër herë kampionen e botës mes kombëtareve më të forta.
“Sot njerëzit thonë se duhet të bëjmë si Franca ose Spanja. Objektivi ynë është që pas disa vitesh të tjerët të thonë se duhet të veprojnë si Gjermania”, deklaroi Klopp gjatë prezantimit.
59-vjeçari pranoi se pritshmëritë janë shumë të larta, por theksoi se rindërtimi i skuadrës kërkon kohë. Ai paralajmëroi gjithashtu mediat për mënyrën se si duhet të trajtohet gjatë aventurës së tij në krye të kombëtares.
“E pranova këtë detyrë edhe pse pashë si u trajtuan Nagelsmann dhe Tuchel. Nëse sulmoni familjen time, largohem. Nëse mendoni se nuk vlej, ma thoni në sy dhe largohem menjëherë, pa kërkuar kompensim”, u shpreh ai.
Klopp tregoi se ka besim të madh te grupi dhe veçanërisht te futbollistët e rinj, ndërsa bëri të qartë se askush nuk është i përjashtuar nga planet e tij.
“Kushdo që ka dëshirë, cilësi dhe bëhet edhe më i mirë kur vesh fanellën e kombëtares, do të ketë mundësinë të luajë. Ky është një fillim i ri”, përfundoi trajneri gjerman.
