Jürgen Klopp ka konfirmuar se është në bisedime me Federatën Gjermane të Futbollit për të marrë drejtimin e kombëtares gjermane pas dorëheqjes së Julian Nagelsmann.
Nagelsmann u largua nga posti pas humbjes zhgënjyese të Gjermanisë ndaj Paraguajit në raundin e parë me eliminim direkt të Kupës së Botës, një rezultat që solli reagime të forta në futbollin gjerman.
Në një intervistë për MagentaTV, ku po punon si analist gjatë Botërorit, Klopp pranoi publikisht kontaktet me DFB-në.
“Gjërat lëvizën shumë shpejt. Julian u largua. DFB po kërkon një pasues dhe ata po flasin me mua. Do të duhet të ketë diskutime intensive, sepse problemet me të cilat po përballemi aktualisht nuk janë vetëm përgjegjësi e Julian Nagelsmann”, tha Klopp.
Ish-trajneri i Liverpoolit vlerësoi gjithashtu Nagelsmann, duke theksuar se ai mbetet një trajner me shumë cilësi.
“Julian është një trajner i jashtëzakonshëm dhe do ta tregojë këtë shumë herë të tjera gjatë karrierës së tij. Tani duhet të presim dhe të shohim si do të zhvillohen këto diskutime”, shtoi ai.
Klopp bëri të ditur se duhet të bisedojë edhe me punëdhënësin e tij aktual, Oliver Mintzlaff, pasi aktualisht mban rolin e drejtuesit të futbollit te Red Bull.
“Duhet të flas edhe me punëdhënësin tim, Oliver Mintzlaff. E di që futbolli gjerman është diçka shumë e rëndësishme për të, prandaj ai është i hapur për këto diskutime”, u shpreh Klopp.
Trajneri gjerman theksoi se kombëtarja ndodhet në një moment vendimtar dhe ka nevojë për ndryshime të mëdha.
“Futbolli gjerman është në udhëkryq. Tani duhet të zbatojmë ndryshime themelore. Nëse do të jem unë ai që do t’i udhëheqë apo dikush tjetër, kjo nuk e ndryshon faktin se këto ndryshime janë të nevojshme”, deklaroi ai.
Edhe pse ende nuk ka një marrëveshje përfundimtare, gjithçka tregon se Klopp është kandidati kryesor për të marrë drejtimin e katër herë kampionëve të botës.
