Në një ndër ndërhyrjet më të guximshme inxhinierike të viteve të fundit, autoritetet kineze kanë zgjedhur të hapin një mal në mes për të ndërtuar një segment të ri të autostradës Liuzhi–Anlong Expressway, në provincën Guizhou.
Në vend që të ndërtohej një tunel, siç ndodh zakonisht në terrene të tilla, inxhinierët kanë vendosur të heqin të gjithë majën e malit, përmes shpërthimeve të kontrolluara dhe përdorimit të makinerive të rënda. Rruga e re me katër korsi kalon mes për mes një gryke të krijuar nga shkëmbinj të thepisur, të lartë deri në 200 metra.
Autostrada, me një gjatësi prej 152 kilometrash, synon të lidhë zonat e izoluara të provincës Guizhou me rrjetin kombëtar rrugor dhe hekurudhor me shpejtësi të lartë. Një nga pikat kulmore të këtij projekti është ura gjigande e Grykës së Huajiang, që pritet të jetë më e larta në botë, me një lartësi që do të kalojë 600 metra.
Sipas autoriteteve kineze, vendimi për të hapur malin dhe jo për të ndërtuar një tunel është bazuar në analiza gjeologjike që treguan se formacioni shkëmbor ishte i përshtatshëm për një ndërhyrje të tillë. Kjo zgjidhje ul ndjeshëm kohën dhe koston e ndërtimit, duke shmangur kthesat dhe vështirësitë teknike që do të kishte sjellë ndërtimi i një tuneli.
Megjithatë, organizatat mjedisore kanë shprehur shqetësime për ndikimin e këtij projekti në ekosistemin e ndjeshëm të zonës karstike. Ato paralajmërojnë për dëmtime të habitatit dhe izolim të faunës së egër, ndërkohë që ende nuk janë bërë publike masa konkrete për rehabilitimin e mjedisit pas përfundimit të punimeve./ilirianews.al
