Një trend i ri po përhapet me shpejtësi në rrjetet sociale: njerëzit po ngarkojnë selfiet e tyre në ChatGPT dhe aplikacione të tjera me inteligjencë artificiale për t’i shndërruar në foto që duken sikur janë shkrepur në vitet ’80.
Rezultati është argëtues: veshje retro, flokë të stilit të asaj kohe, ngjyra dhe sfond që të japin përshtypjen e një fotografie të vjetër familjare. Por pas kësaj loje fshihet një pyetje shumë më serioze: çfarë ndodh me foton tuaj pasi e ngarkoni?
Ekspertja e sigurisë kibernetike Christina Pöpper, nga NYU Abu Dhabi, thotë se një foto nuk është thjesht një imazh. Ajo mund të përmbajë të dhëna që lidhen me personin që shfaqet në të.
Një selfie, për shembull, tregon fytyrën tuaj dhe për këtë arsye konsiderohet e dhënë personale.
Në varësi të fotografisë, skedarit dhe mënyrës se si është krijuar, mund të ketë edhe informacione të tjera të lidhura me të, si pajisja me të cilën është bërë fotografia, data apo të dhëna të tjera teknike.
Kur e ngarkoni fotografinë në një shërbim të inteligjencës artificiale, ajo nuk përpunohet vetëm në telefonin tuaj. Fotoja dërgohet në sistemin e kompanisë që ofron shërbimin, në mënyrë që AI ta analizojë dhe të krijojë versionin e ri që i kërkoni.
Kjo nuk do të thotë se fotografia juaj do të vidhet, do të publikohet apo do të përdoret automatikisht për qëllime të tjera. Por do të thotë se, duke e ngarkuar, ju po ia dorëzoni për përpunim një sistemi të jashtëm dhe duhet të dini se çfarë parashikojnë rregullat e tij për ruajtjen dhe përdorimin e të dhënave.
Rreziku bëhet edhe më i madh kur në foto shfaqen persona të tjerë, fëmijë, dokumente, adresa apo informacione që mund të zbulojnë të dhëna personale.
Prandaj këshilla e ekspertëve është e thjeshtë: para se të ngarkoni një foto në një sistem AI, mendoni nëse do të ndiheshit rehat nëse ajo foto do të ruhej në një sistem që nuk është i juaji.
Sepse një selfie mund të duket thjesht si një foto argëtuese nga vitet ’80, por në të vërtetë ajo përmban fytyrën dhe identitetin tuaj.
