Bayern po pret me ankth gjendjen e Harry Kane para ndeshjes së parë çerekfinale në Champions League ndaj Real Madrid. Sulmuesi anglez mungoi në fitoren 3-2 ndaj Freiburg për shkak të një problemi në kavilje, ndërsa edhe me Anglinë kishte mbetur jashtë pas një dëmtimi në stërvitje gjatë grumbullimit të marsit. Kane mbetet figura kryesore e Bayern këtë sezon, me 48 gola në 40 ndeshje në të gjitha kompeticionet.
Megjithatë, për Bayern ka ardhur edhe një lajm inkurajues. Të hënën, Kane u rikthye në stërvitjen e fundit të skuadrës para sfidës me Real Madrid, duke rritur shanset që të jetë të paktën i gatshëm për t’u përfshirë në ndeshje. Drejtori sportiv Max Eberl tha se stafi mjekësor po punon vazhdimisht me të dhe se në klub besojnë se gjithçka do të shkojë mirë.
Optimist është edhe Vincent Kompany, i cili la të kuptohet se ka ndjesinë që Kane do t’ia dalë, ndërsa Joshua Kimmich shkoi edhe më larg me besimin e tij, duke thënë se anglezi “do të luante edhe me karrocë” kundër Real Madrid. Kjo tregon sa i rëndësishëm konsiderohet ai brenda dhomave të zhveshjes së Bayern.
Vendimi përfundimtar për aktivizimin e Kane pritet të merret shumë pranë fillimit të ndeshjes në “Santiago Bernabeu”. Prania e tij do të ishte një shtysë e madhe sportive dhe psikologjike për Bayern, në një përballje ku bavarezët synojnë të hedhin një hap të madh drejt gjysmëfinales.
