Juventusi fitoi bindshëm 4-0 ndaj Pisas dhe vazhdon të mbetet në ndjekje të zonës Champions, ndërsa për skuadrën toskane mbijetesa në Serie A duket gjithnjë e më e vështirë.
Fitorja e thellë e bardhezinjve erdhi pas një ndryshimi taktik dhe në qasje nga ana e trajnerit Luciano Spalletti në pushimin mes pjesëve, pasi pjesa e parë ishte e vakët dhe Juventus shpesh ra në “kurthin” e lojës së Pisas. Në pjesën e dytë, superioriteti i Juventusit u bë i dukshëm dhe u konkretizua me golat e Cambiaso, Thuram, Yildiz dhe Boga.
Edhe pse pa një sulmues të mirëfilltë në majë të repartit ofensiv, skuadra e Spallettit arriti të krijojë më shumë raste në pjesën e dytë, duke shfrytëzuar sidomos shpejtësinë dhe përshpejtimet e Conceiçao në krah.
Para ndeshjes pati edhe momente interesante në tribuna. Ish-sulmuesi i Juventusit, Mario Mandzukic, u prit me shumë duartrokitje nga tifozët bardhezi. Ndryshe ndodhi me Juan Cuadrado, i cili u aktivizua në pjesën e dytë për Pisan dhe u vërshëllye nga tifozët për shkak të periudhës së tij të fundit te Inter dhe Atalanta pas shumë viteve te Juventusi.
Në formacionin e Juventusit, Spalletti konfirmoi portierin Perin për të tretën ndeshje radhazi dhe aktivizoi Gattin nga minuta e parë në mbrojtje. Nga ana tjetër, trajneri i Pisas, Hiljemark, bëri disa zgjedhje surprizë duke aktivizuar nga fillimi Durosinmi dhe Calabresi.
Rasti i parë i rrezikshëm për Juventusin erdhi nga Moreo, por portieri Perin ishte i vëmendshëm në goditjen me kokë. Më pas bardhezinjtë filluan të rrisin ritmin e lojës, me Thuram që iu afrua golit me një goditje të fortë nga distanca, ndërsa raste të tjera erdhën nga Conceiçao, Gatti dhe David.
Megjithatë, në pjesën e dytë Juventusi arriti të zhbllokojë dhe të dominojë plotësisht ndeshjen, duke siguruar një fitore të pastër 4-0 që e mban skuadrën në garë për vendet që çojnë në Champions League.
