FC Barcelona po mendon për një rindërtim të repartit ofensiv për sezonin e ardhshëm, ndërsa emra të ndryshëm kanë nisur të qarkullojnë për përforcimet e verës.
Me sezonin që po shkon drejt fundit, drejtuesit e klubit katalanas po shqyrtojnë lëvizje që mund ta rrisin nivelin e skuadrës, me synimin për t’u rikthyer fuqishëm edhe në Europë. Në këtë kuadër, e ardhmja e Robert Lewandowski dhe Marcus Rashford duket larg “Camp Nou”.
Teksa për Julian Alvarez është folur shumë në muajt e fundit, transferimi i sulmuesit argjentinas nga Atletico Madrid shihet si mjaft i vështirë. Pikërisht për këtë arsye, në debatet sportive kanë nisur të dalin edhe alternativa të tjera.
Sipas asaj që u diskutua në Carrusel Deportivo, gazetari Santi Gimenez hodhi një ide surprizë për sulmin e Barcelona, duke thënë se ai do të preferonte një dyshe me Oyarzabal dhe Muriqi, në vend të Julian Alvarez.
“Unë as që dua ta shoh Julian Alvarez. Preferoj Oyarzabal dhe Muriqi”, u shpreh ai.
Santi Gimenez vlerësoi shumë sulmuesin e Mallorca, duke theksuar se Shqiptari i Kosovës është nënvlerësuar për atë që po bën me skuadrën e tij. Sipas tij, të shënosh 22 gola me një ekip si Mallorca është një arritje e madhe dhe meriton shumë më tepër vëmendje.
Edhe Bruno Alemany mbështeti këtë ide, duke theksuar se Oyarzabal do t’i përshtatej shumë mirë stilit të lojës së Barcelona, ndërsa profili i Muriqi mbetet shumë i vlefshëm në futbollin modern, sidomos për skuadrat që kanë nevojë për një alternativë të fortë dhe efikase në sulm.
Sipas diskutimit, Muriqi mund të mos ishte domosdoshmërisht titullar te një klub si Barcelona apo Real Madrid, por do të ishte një armë shumë e vlefshme nga stoli, një lojtar që mund të ndryshojë ndeshjet në momentet e vështira.
Në këtë pikë, u kujtua edhe shembulli i Joselu, i cili kishte rol të rëndësishëm te Real Madrid si alternativë nga pankina, duke treguar se edhe lojtarë që nuk kanë gjithmonë statusin e yllit mund të bëhen vendimtarë në skuadrat e mëdha.
