Izraeli po përballet për të dytën ditë me zjarre. Kryeministri izraelit Benjamin Netanyahu tha të enjten se 18 persona janë arrestuar nën dyshimin për zjarrvënie të qëllimshme, sipas medias izraelite Arutz Sheva.
Shërbimi zjarrfikës i Izraelit thotë se më shumë se 150 ekipe zjarrfikëse po punojnë ende për të shuar flakët dhe 12 avionë po punojnë për të vënë nën kontroll flakët.
Zjarret shpërthyen të mërkurën përgjatë autostradës kryesore Jerusalem-Tel Aviv, duke bërë që policia të mbyllë rrugët dhe të evakuojë mijëra banorë nga zonat përreth.
Të paktën 23 persona morën ndohmë mjekësore për shkak të thithjes së tymit.
Gjithashtu 17 zjarrfikës janë plagosur, sipas transmetuesit publik të Izraelit, Kan.
Ekipet punuan gjatë gjithë natës, duke lejuar rihapjen e rrugëve kryesore, përfshirë rrugën Jerusalem-Tel Aviv, tha policia.
Emergjencë kombëtare
Të nxitura nga temperaturat e larta dhe erërat e forta, zjarret u përhapën me shpejtësi nëpër zonat pyjore, duke shkaktuar evakuime nga të paktën pesë komunitete, tha policia.
Vendet evropiane, Italia dhe Qiproja, kanë dërguar tetë aeroplanë zjarrfikës në Izrael për të mbështetur përpjekjet e tij të emergjencës, sipas The Times of Israel.
Ndihma vjen ndërsa zjarret vazhdojnë të digjen në 11 vatra pranë Jerusalemit, thanë mediat vendase, duke cituar Shërbimin e Zjarrfikësve dhe Shpëtimit të Izraelit.
Kryeministri i Izraelit, Benjamin Netanyahu, ka shpallur një “gjendje të jashtëzakonshme kombëtare”, duke paralajmëruar se zjarret mund të përhapen në Jerusalem.
Ushtria izraelite tha se personeli i saj po ndihmonte në Jerusalem dhe në rrethe të tjera qendrore.
“Gjatë natës, dhjetëra automjete inxhinierike filluan të operonin në të gjithë vendin për parandaluar përhapjen e zjarrit në vatra të tjera”, thuhej në një deklaratë ushtarake të enjten.
