Inter fitoi 2-0 ndaj Lecce-s falë dy golave të shënuar nga goditjet nga këndi, duke zgjatur serinë pozitive dhe duke konsoliduar kreun e renditjes. Nerazzurrët zhbllokuan ndeshjen në fund, në një përballje që po bëhej gjithnjë e më e ndërlikuar, dhe tani e shohin Milanin 10 pikë pas.
Fjala “fotokopje” do të thotë riprodhim i saktë i një dokumenti, teksti apo imazhi – dhe kështu mund të përshkruhet edhe kjo ndeshje, minus një gol, pasi Lecce-Inter ngjau shumë me Inter-Lecce-n e pak më shumë se një muaji më parë, kur një lëvizje nga stoli i Cristian Chivu i dhuroi zikaltërve tre pikë të arta. Edhe këtë herë, trajneri i Interit bëri dy zgjedhje vendimtare gjatë lojës: Mkhitaryan dhe Akanji. Skenari ishte i njëjtë – Lecce rrezikoi t’i fuste në kurth zikaltërit me lojën e organizuar nga Di Francesco, por në fund vendosën goditjet standarde. Dy kënde, dy gola, 2-0. Inter falënderon dhe shkëputet përkohësisht me 10 pikë nga vendi i dytë.
Inter u paraqit pa katër lojtarë kyç: Lautaro, Barella, Calhanoglu dhe Dumfries, sidomos pas humbjes europiane në Bodo Glimt që vuri në rrezik jo vetëm kualifikimin në Champions, por edhe gjendjen fizike të disa titullarëve. Zielinski u rikuperua dhe nisi nga minuta e parë si organizator, me Sucic në krah dhe Frattesi që u aktivizua më pas. Në krahë u rikthyen Dimarco dhe Luis Henrique, ndërsa para Sommer luajtën Bisseck, De Vrij dhe Bastoni. Në sulm, pa kapitenin, Inter u mbështet te Esposito dhe Thuram.
Lecce, nga ana tjetër, ndryshoi pak nga formacioni që kishte marrë dy fitore radhazi. Falcone në portë, Veiga e Gallo në mbrojtje, Thiago Gabriel me Gaspar (i dëmtuar që në minutën e katërt, zëvendësuar nga Siebert), Coulibaly dhe Ramadani në mesfushë, Gandelman si mesfushor ofensiv, Pierotti e Sottil në krahë dhe Cheddira si sulmues i vetëm.
Rasti i parë erdhi që në sekondat e para: Thuram shpërtheu dhe goditi, por Gaspar bllokoi duke u dëmtuar. Siebert hyri menjëherë dhe më pas shpëtoi Lecce-n me një ndërhyrje vendimtare në vijë, pasi Falcone kishte ndalur fillimisht Luis Henrique. Edhe Pio pati dy mundësi të mira, por portieri vendas ishte i pakalueshëm.
Në pjesën e dytë, Inter gjeti rrugën e rrjetës me Dimarco, por goli u anulua për pozicion jashtë loje të Thuram. Presioni u rrit dhe Chivu hodhi në fushë Akanji, Mkhitaryan, Diouf dhe Bonny. Lëvizja rezultoi vendimtare: nga një kënd i Dimarco-s, Mkhitaryan shënoi me të djathtën për 1-0. Pak minuta më vonë, një tjetër goditje nga këndi solli golin e dytë, këtë herë me Akanji, që vulosi rezultatin dhe i dhuroi Dimarco-s asistin e 14-të sezonal.
Në fund, Bastoni u ndëshkua me karton dhe do të mungojë ndaj Genoa-s, por Inter vazhdon të fluturojë lart, me një avantazh të qartë prej 10 pikësh në krye të renditjes.
