Edhe pse kontrata me Real Madrid i skadon në verën e vitit 2026, ky mund të jetë sezoni i fundit për Carlo Ancelotti-n në krye të “Los Blancos”.
Prej kohësh italiani përflitet për të marrë drejtimin e Brazilit dhe këto zëra sa vijnë e shtohen. Ancelotti mund të marrë drejtimin e 5 herë kampionëve të botës menjëherë sapo të mbyllë këtë sezon me Real Madridin.
Dëshira e madhe e drejtuesve të Realit për t’i besuar stolin ka qenë Xabi Alonso, por spanjolli duket se do të respektojë kontratën dhe do të qëndrojë deri në fund të saj te Leverkusen.
Për të mos mbetur “bosh” nëse Ancelotti ikën në fund të sezonit, sipas mediave gjermane Real Madrid po mendon emrin e Jurgen Klopp për t’i besuar drejtimin e skuadrës. Sipas disa burimeve pranë klubit madrilen, Florentino Perez e sheh Jurgen Klopp si kandidatin ideal për të drejtuar skuadrën në vitet e ardhshme.
Trajneri gjerman ka qenë pushim pas largimit nga Liverpool dhe tani duket se është gati të rikthehet në aksion. Perez duket se është i gatshëm t’i plotësojë dëshirat që ai ka për merkaton dhe sigurisht një rrogë të majme. Stili i tij “agresiv” i lojës dhe aftësia për të nxjerrë më të mirën nga lojtarët e kanë bindur Perez sipas raportimit në fjalë për të zgjedhur pikërisht Klopp si kandidatin kryesor për të marrë drejtimin e Realit në verë.
