TIRANË– Një ngjarje e rëndë trodniti Tiranën ditën e sotme. 4 adoleshentë të moshës 14 vjeçare, dy prej tyre nxënës të shkollës 9 vjeçare ‘Fan Noli’ janë përfshirë në një sherr ku mësohet se është përdorur edhe një thikë.
Martin Cani 14 vjeç është goditur në zemër dhe ka ndërruar jetë në spitalin e Traumës. Ndërkohë Luis Meçja 14 vjeç ka plagë në gjoks dhe ndodhet në gjendje stabël në spital.
Adoleshent i tretë ndodhet në një spital privat në Tiranë, i plagosur në krahun e majtë. Ky i fundit dyshohet se është autori i ngjarjes. Sherri ka nisur për motive banale, fillimisht në rrjetet sociale.
Report Tv ka sjellë dëshminë e një gruaje e cila shoqëroi 14-vjeçarin pas sherrit me adoleshentët drejt spitalit. Ajo tregon se si e gjeti të miturin të shtrirë në tokë me plagë, mbi të cilin ishte një turmë njerëzish që i hidhnin raki.
Gruaja e ka marrë djalin në makinë për ta dërguar në spital dhe rrugës thotë se ndesh me ambulancën, së cilës i dha djalin me shenja jete, por Martiim Cani ndërroi jetë në spital.
“Unë isha duke blerë mish për biznesin tim dhe dëgjoj ulërima. Kur shoh djali ishte përtokë, i hidhnin raki dhe i mbanin plagën. Askush nuk po vinte ta merrte, as mësues nuk pashë, asnjë. Ishte moment sekondi. Për 3 minuta shpërndava të gjithë turmën, mora djalin kam hipur mbi trotuar kam ecur me shpejtësi për në spital, pashë ambulancën e ndalova. Rrugës djali u përmend. E mora në makinën time dhe nuk po më ndihmonte asnjë, nuk erdhi njeri që të më vinte në makinë shoqërues. Aty më erdhi një djalë që punonte në laborator, i vuri dorën te plaga dhe djalin e përmendëm gjatë rrugës. I thosha shpirti nënës, shpirti mamit ti u bëre mirë, ia hodhe, kaloi çdo gjë. Ai bërtiti.
Rri i qetë i thash se shpëtove, kaloi çdo gjë, erdhëm në spital. Ia dhashë ambulancës dhe këtu erdha të interesohem nëse shpëtoi apo jo se nuk ja di as emrin. Kjo ka ndodhur rreth orës 13:00-13:30. Nxënës kishte plot, qanin ulërinin, njerëz pa fund që nuk dinin çtë bënin. Shpërndava turmën, rrëmbeva djalin, mora dhe një ndihmës dhe vrapova drejt ambulancës. Unë shpejtova më shpejt se ambulanca, kalova mbi trotuare, pengesa dhe arrita deri te ambulanca. E çova djalin gjallë dhe pa pikë gjaku. Kam makinën dhe s’ka asnjë njollë gjaku. Atletet e çunit ndodhen në makinë time”, tregon ajo.
