Real Madridi përjetoi një nga netët më të errëta të sezonit në Lisbonë, duke pësuar një humbje të rëndë ndaj Benfikës që e nxori jashtë Top 8 dhe e detyroi të kalojë në fazën “playoff” të Champions League. Dy golat e Kylian Mbappé vetëm sa e zbutën një disfatë të merituar, në një ndeshje ku madrilenët u shfaqën të brishtë në çdo aspekt. Marco Asensio dhe Rodrygo u ndëshkuan me karton të kuq, duke e mbyllur mbrëmjen në kaos të plotë.
Skuadra spanjolle duket e bllokuar në një cikël të rrezikshëm mes optimizmit dhe fatalizmit. Në “Da Luz”, Real Madridi dështoi në agresivitet, u tërhoq keq në mbrojtje dhe humbi vazhdimisht kontrollin në zonën e vet. Benfica, e përgatitur mjeshtërisht nga José Mourinho, shfrytëzoi presionin e lartë dhe kundërsulmet direkte – firmë klasike e trajnerit portugez – për ta dominuar totalisht ndeshjen. Më e keqja për Realin nuk ishte vetëm rezultati, por ndjesia se me paraqitje të tilla rruga në Evropë do të jetë shumë e shkurtër.
Benfica përfitoi maksimalisht nga kaosi i madrilenëve, duke krijuar raste të shumta dhe duke gjetur golat me Pavlidis, Schelderup dhe në fund me një moment historik: portieri Anatoliy Trubin shënoi me kokë në minutën 90+8, duke vulosur fitoren dhe kualifikimin. Sipas Opta-s, Trubin u bë portieri i parë në historinë e garave evropiane që shënon kundër Real Madridit, si dhe portieri i pestë që shënon në Champions League, pas Jörg Butt, Sinan Bolat, Vincent Enyeama dhe Ivan Provedel.
Mbappé ishte i vetmi rreze drite për Realin, duke shënuar dy herë dhe duke treguar instinktin e “vrasësit të heshtur”, por as ai nuk mundi ta shpëtojë skuadrën nga një mbrëmje katastrofike. Benfica, edhe pse jo më me yjet e dikurshëm, tregoi krenari, disiplinë dhe intensitet maksimal, duke e merituar plotësisht fitoren dhe kalimin në fazën me eliminim direkt.
