Lëvizja rebele Houthi në Jemen ka konfirmuar vdekjen e kryeministrit të saj të vetëshpallur, Ahmed Ghaleb Nasser al-Rahawi, i cili u vra në sulmet ajrore izraelite disa ditë më parë. Grupi i mbështetur nga Irani njoftoi se disa zyrtarë të tjerë të lartë ishin vrarë gjithashtu gjatë sulmeve të forcave mbrojtëse izraelite (IDF) që goditën kryeqytetin e Yemenit, Sana’a, të enjten. IDF tha se kishte sulmuar një “shënjestër ushtarake” të Houthi-ve në zonën e Sana’a, por nuk dha detaje të tjera.
Houthis kanë kontrolluar pjesën më të madhe të veriperëndimit të Jemenit që prej vitit 2014, pas rrëzimit të qeverisë së njohur ndërkombëtarisht nga Sana’a dhe fillimit të një lufte civile shkatërruese. Sipas deklaratave të Houthis, Rahawi u vra bashkë me disa ministra të tjerë, megjithatë, ata nuk dhanë emrat e tjerë. Siti i lajmeve saudit Al-Hadath raportoi se ministri i jashtëm, si dhe ministrat e drejtësisë, rinisë dhe sporteve, çështjeve sociale dhe punës, kishin humbur jetën. Zyra e presidentit të Houthis, Mahdi Al-Mashat, tha se disa ministra të tjerë kishin pësuar lëndime të lehta dhe të rënda nga sulmi. Ajo shtoi se Muhammad Ahmed Miftah, zëvendës kryeministri i Houthi-ve, do të merrte rolin e Rahawi-t.
Rahawi e kishte mbajtur postin e tij që nga gushti i vitit 2024. IDF ende nuk ka komentuar publikisht mbi zhvillimet e fundit. Që nga fillimi i luftës midis Izraelit dhe Hamasit në Gaza, Houthis kanë lançuar rregullisht raketat ndaj Izraelit dhe kanë sulmuar anijet tregtare në Detin e Kuq dhe Gjirin e Adenit, duke thënë se po veprojnë në solidaritet me palestinezët. Izraeli, nga ana e tij, ka kryer sulme ajrore ndaj objekteve në zonat e kontrolluara nga Houthi. Në fillim të këtij muaji, Izraeli njoftoi se kishte goditur objektiva të Houthi në Sana’a, si përgjigje ndaj një sulmi me raketat që sipas Izraelit përmbanin municione me klaster.
