Harry Kane ka zhvilluar sezonin më të mirë të karrierës dhe nuk e fsheh ambicien për të fituar Topin e Artë.
Sulmuesi anglez ka shënuar 61 gola në të gjitha kompeticionet me Bayern Munich, duke fituar Bundesligën, DFB Pokal dhe Superkupën e Gjermanisë. Shifrat e tij e kanë vendosur mes kandidatëve kryesorë për çmimin më prestigjioz individual në futboll.
Në një intervistë për L’Équipe, Kane u shpreh i bindur se ka bërë mjaftueshëm për ta fituar Topin e Artë, të paktën duke mos llogaritur atë që mund të ndodhë në Kupën e Botës.
“Pa llogaritur Botërorin, mendoj se e meritoj ta fitoj. Favoritë janë lojtarët që arritën në finalen e Champions League dhe unë, por nuk jam nga ata që kërkoj njohje me çdo kusht. Përpiqem të flas me paraqitjet e mia në fushë”, deklaroi Kane.
Anglezi pranoi se statistikat e lojtarëve të mëdhenj e motivojnë, por theksoi se nuk ka qenë i fiksuar pas rekordeve. Ai shtoi se ky sezon ka qenë ndryshe, sepse nuk ka pasur rënie në nivelin e paraqitjeve.
Kane e lidhi suksesin e tij edhe me shokët e skuadrës dhe stafin e Bayern, duke theksuar se pa ndihmën e tyre nuk do të kishte arritur këto shifra.
Ceremonia e Topit të Artë do të ketë një kuptim të veçantë për të, pasi do të zhvillohet në Londër. “Ta fitoja në qytetin tim do të ishte edhe më speciale”, tha sulmuesi.
Pavarësisht sezonit fantastik, Kane nuk kërkon të ndalet. Ai paralajmëroi se objektivi i sezonit të ardhshëm do të jetë të thyejë rekordin e tij personal të golave.
