Barcelona ka marrë lajme të këqija nga infermieria përpara ndeshjes së Champions League ndaj PSG-së. Klubi katalanas ka konfirmuar dëmtimet e Eric García dhe Jules Koundé, ndërsa situata më serioze është ajo e mbrojtësit spanjoll.
Eric García ka pësuar një dëmtim muskulor në muskulin rectus femoris të kofshës së djathtë dhe do të qëndrojë jashtë fushave për rreth tre deri në katër javë.
“Lojtari i ekipit të parë Eric García ka pësuar një dëmtim muskulor në rectus femoris të kofshës së djathtë. Koha e rikuperimit do të jetë mes tre dhe katër javësh”, njoftoi Barcelona.
Kjo do të thotë se Eric do të humbasë ndeshjen ndaj PSG-së, El Clásicon kundër Real Madridit, si dhe sfidat ndaj Alavés dhe Aston Villa. Rikthimi i tij mund të ndodhë ndaj Atlético Madrid më 8 nëntor.
Edhe Jules Koundé do të mungojë ndaj PSG-së. Francezi ka pësuar një ndrydhje të shkallës së parë në kyçin e majtë dhe gjendja e tij do të monitorohet në ditët e ardhshme.
Barcelona nuk e ka përjashtuar ende mundësinë që Koundé të jetë gati për El Clásicon. Rikuperimi nga një dëmtim i tillë zakonisht kërkon rreth një javë, ndaj francezi mbetet në garë për sfidën me Real Madridin.
Lajmi pozitiv për Hansi Flick është gjendja e Gerard Martín. Mbrojtësi u zëvendësua në pushimin e ndeshjes ndaj Betis, por prania e tij kundër PSG-së nuk është në dyshim.
Në mungesë të Eric García dhe Koundé, Gerard Martín pritet të formojë dyshen e qendrës së mbrojtjes me Cubarsí, ndërsa Cancelo dhe Espart janë alternativat e pritshme për krahët.
