Policia e Tiranës ka finalizuar me sukses operacionin e koduar “Rotondo”, pas një hetimi dymujor, duke goditur një tjetër grup kriminal të dyshuar për trafikimin dhe shitjen e armëve të zjarrit.
Si rezultat i hetimeve të kryera me metoda proaktive, në koordinim me Prokurorinë e Tiranës, shërbimet e Komisariatit të Policisë Nr. 4 ndërmorën kontrolle dhe veprime operative me objektiv goditjen e veprimtarive kriminale që lidhen me trafikimin dhe tregtimin e armëve.
Gjatë operacionit u arrestuan në flagrancë shtetasit Donati Jaku, 31 vjeç, banues në Shkodër dhe Florian Gjeta, 22 vjeç, banues në fshatin Domje.
Automjeti tip “Volkswagen”, që drejtohej nga 22-vjeçari dhe ku udhëtonte si pasagjer shtetasi D. J., u ndalua për kontroll në bashkëpunim me Forcën e Posaçme Operacionale të DVP Tiranë, në zonën e njohur si “Rrethi i Freskut”.
Gjatë kontrollit në automjet, policia gjeti dhe sekuestroi 6 armë zjarri pistoleta të tipit “SigSauer”, të dyshuara se ishin trafikuar nga Mali i Zi me qëllim shitjen kryesisht në zonën e Freskut. Bashkë me armët u sekuestruan edhe automjeti si dhe 4 telefona celularë.
Në vijim të hetimeve për këtë veprimtari kriminale, policia ka identifikuar dhe shpallur në kërkim edhe një bashkëpunëtor të dyshuar të të arrestuarve, shtetasin E. S..
Policia bën me dije se puna vijon për kapjen e personit të shpallur në kërkim, ndërsa në drejtimin e Prokurorisë së Tiranës po zhvillohen hetime të mëtejshme për të identifikuar dhe persona të tjerë që mund të jenë të përfshirë në këtë aktivitet kriminal.
Materialet procedurale i janë referuar Prokurorisë së Tiranës për veprime të mëtejshme.
