Gjykata e Posaçme ka pranuar kërkesën e SPAK për zgjatjen me tre muaj të afatit të hetimeve ndaj Aleksandër, Kristi dhe Fation Bushgjokaj, si dhe Petrit Çakrit, të akuzuar për vrasjen e të riut Renis Dobra. Prokuroria e Posaçme argumentoi se hetimet duhet të vijojnë deri në muajin tetor, pasi mbeten për t’u kryer disa veprime të rëndësishme proceduriale. Sipas SPAK, është i nevojshëm përfundimi i ekspertimit të telefonave celularë, si dhe kryerja e mbivendosjeve të gjurmëve papilare, të cilat konsiderohen të rëndësishme për zbardhjen e plotë të ngjarjes.
Kërkesa u kundërshtua nga avokati Erjon Kullolli, mbrojtësi ligjor i Fation Bushgjokajt. Ai pretendoi se SPAK ka pasur mundësinë objektive për të kryer këto veprime hetimore brenda afateve të deritanishme dhe se nuk ka arsye për shtyrjen e mëtejshme të hetimeve.
Sipas avokatit, deri në këtë fazë të procesit, Prokuroria e Posaçme nuk ka arritur të provojë elementët e veprës penale të “rrëmbimit”, si dhe nuk ka argumentuar se kjo vepër është kryer në kuadër të bashkëpunimit të posaçëm të një grupi të strukturuar kriminal.
Ngjarja ka ndodhur më 8 korrik 2025 ndërsa 23-vjeçari Renis Dobra u gjet i pajetë më 9 korrik pranë liqenit të Shkopetit. Policia ka konfirmuar nga pamjet filmike dhe nga provat se katër personat Fatjon Bushgjoka (i arrestuar) Aleksandër Bushgjoka, Kristi Bushgjoka si dhe i Petrit Çakrri kanë marrë pjesë të gjithë në rrëmbimin e 23-vjecari.
Pak ditë pas ngjarjes Petrit Çakrri u arrestua në hyrje të Tropojës. Sakaq pista kryesore e hetimit vijon të jetë konflikti i drogës në Gjermani mes viktimës dhe vëllezërve Bushgjoka. Megjithatë nuk përjashtohet mundësia që vëllezërit Bushgjoka dhe Petrit Çakrri të kenë marre porosi nga persona të tretë pikërisht për trafikimim e lëndëve narkotike.
