Kryeministri Edi Rama zhvilloi sot një takim me ekspertët e AKSHI-t të angazhuar në konfigurimin e platformës “Pasqyra Albania”, me qëllim njohjen nga afër me funksionalitetet dhe risitë që ajo ofron.
Gjatë bisedës, Rama shpjegoi se platforma është ndërtuar mbi katër shtylla kryesore, të cilat synojnë të rrisin transparencën dhe ndërveprimin e qytetarëve me institucionet publike.
Përmes saj, sipas kryeministrit, qytetarët do të kenë mundësi të ndjekin investimet publike dhe ecurinë e projekteve në zonat ku jetojnë; të informohen mbi vendimet e bashkive dhe këshillave bashkiakë; të monitorojnë në kohë reale statusin e aplikimeve, shërbimeve dhe ankesave, si dhe fazat e trajtimit të tyre nga institucionet përgjegjëse. Një tjetër funksionalitet i platformës do t’u mundësojë qytetarëve të japin mendimet dhe sugjerimet e tyre mbi projektaktet që janë në proces konsultimi publik.
Kryeministri Rama: Këtu jemi me djemtë e shkëlqyer të AKSHI-t, të cilët kanë zhvilluar një tjetër projekt jashtëzakonisht të rëndësishëm për ne, i cili lindi si rezultat i reflektimeve pas manifestimeve të mëdha të protestës së fillimqershorit të flamingove dhe u premtua si një hap i rëndësishëm përpara në marrëdhënien mes qytetarit dhe shtetit dhe anasjelltas për të adresuar një çështje kyçe ose më saktë “thembrën e Akilit” të këtyre marrëdhënieve që është humbja e ankesës apo e kërkesës në oqeanin e burokracisë dhe nga ana tjetër janë një sërë elementësh të tjerë pa diskutim të “Pasqyrë Albania”-s që e transformojnë të gjithë shtetin në sytë e qytetarit me një klik me një dritare të vetme.
U punua intensivisht , tani jemi përballë rezultatit që së shpejti do ta bëjmë të aksesueshëm për publikun.
