Një nënë, një baba dhe një vajzë e mitur, të gjithë nga Bangladeshi, u qëlluan për vdekje me thikë në një shtëpi në Via Montiglio, në lagjen Aurelio të Romës. Tragjedia ndodhi mbrëmjen e së premtes, më 26 qershor, dhe alarmi u dha rreth orës 20:30. Fëmija më i madh i çiftit u plagos, por jo rëndë.
Mediat italiane shkruajnë se, të vrarët ishin Kamal Uddin, 39 vjeç, gruaja e tij Arzu, 38 vjeçe, dhe vajza e tyre 6-vjeçare, Alicia. I vetmi i mbijetuar, siç u përmend, është djali i madh i çiftit, Onion, 18 vjeç, i cili u plagos dhe u dërgua në spital. Gjendja e tij nuk është serioze. Djali thuhet se është marrë në pyetje nga skuadra e policisë që po heton rastin.
Fqinjët thuhet se ngritën alarmin pasi dëgjuan britma që vinin nga apartamenti i familjes dhe panë një person që po ikte në rrugë. Një nga pistat është se viktimat e njihnin vrasësin e tyre, i cili dyshohet se ishte një mik i familjes.
“Ai vrau të gjithë familjen time. Shkova në shtëpi dhe e pashë duke pastruar gjakun. Kishte gjak kudo. Ai i vrau të gjithë”, thuhet se ishin fjalët e para të djalit të madh të çiftit, të raportuara nga “Il Messaggero”, menjëherë pasi zbuloi vdekjen e prindërve dhe motrës së tij të vogël.
Sipas një rindërtimi fillestar të raportuar nga gazeta, vrasësi, pasi vrau çiftin dhe vajzën e vogël, i fshehu trupat nën shtrat. Më pas ai u përball me djalin e madh të çiftit, i cili sapo ishte kthyer në shtëpi. Më pas nisi një sherr mes të dyve, me 18-vjeçarin që arriti t’i shmangej sulmuesit dhe të jepte alarmin, duke u larguar nga apartamenti.
“Ishte ky i ri, i mbuluar me gjak. Kishte plagë në kokë, duar dhe këmbë. Bërtiste se të gjithë ishin të vdekur. U përpoqa ta qetësoja”, tha një nga personat e parë që i erdhi në ndihmë, për “Il Messaggero”, duke folur për djalin e madh të çiftit.
Gruaja, sipas gazetës, pa gjithashtu vrasësin të ikte me vrap. “Ai kishte lëkurë të errët dhe kishte veshur një bluzë polo, mendoj se ishte blu. Ai po vraponte shumë shpejt, por vura re se kishte doreza në duar”, thuhet se tha gruaja, e cila në atë moment po shëtiste qenin dhe vajzën e saj.
Kërkimet për vrasësin vazhduan gjatë gjithë natës, përfshirë edhe në zonën e pyllëzuar përreth Casalottit, ku ndodhi tragjedia. Për këtë qëllim u përdorën dronë me kamera infra të kuqe.
Hetuesit aktualisht po punojnë në disa pista. Në orët e fundit, ata kanë marrë në pyetje edhe shumë miq dhe të njohur të familjes. Gjithashtu po kryhet një kontroll i apartamentit për të përcaktuar nëse mungon diçka. Kamerat e sigurisë në zonë dhe telefonat celularë të familjes po kontrollohen gjithashtu, pasi ato mund të përmbajnë gjurmë të kontakteve të tyre të fundit.
