Një sasi e dyshuar lënde eksplozive është gjetur e pashpërthyer në orët e para të mëngjesit të sotëm pranë derës së një biznesi në pronësi të këngëtarit Rigels Rajku, i njohur si Noizy.
Ngjarja është regjistruar në lagjen nr. 13, në zonën e Plazhit në Durrës, ndërsa pas konstatimit të lëndës plasëse, në vendngjarje kanë mbërritur shërbimet e Policisë dhe grupi hetimor.
Lënda e dyshuar eksplozive është sekuestruar për t’iu nënshtruar ekzaminimeve, teka policia ka nisur punën për zbardhjen e plotë të rrethanave të ngjarjes.
Në fokus të hetimeve janë pamjet e kamerave të sigurisë të bizneseve dhe ambienteve përreth, të cilat pritet të ndihmojnë në identifikimin e personit ose personave që kanë vendosur lëndën plasëse.
Deri më tani nuk raportohet për persona të lënduar apo dëme materiale. Hetimet vijojnë për identifikimin dhe kapjen e autorëve të dyshuar.
