Gazetari Sokol Bregu ka komentuar vendimet e Gjykatës së Posaçme (GJKKO) ndaj ish-zyrtarëve dhe drejtorëve të Bashkisë së Tiranës, duke i cilësuar dënimet si të buta dhe jo proporcionale me akuzat.
I ftuar në emisionin e MCN TV, Bregu u shpreh se gjykata ka treguar “përkëdhelje” ndaj drejtuesve të bashkisë, ndërsa prokuroria, sipas tij, nuk ka shkuar deri në fund të hetimeve, veçanërisht për aspektin pasuror.
Ai theksoi se hetimi duhej të ishte zgjeruar edhe për titullarët e drejtorive dhe jo vetëm për anëtarët e Komisioneve të Vlerësimit të Ofertave (KVO), të cilët sipas tij mund të kenë qenë të detyruar të firmosin vendime në kundërshtim me ligjin.
Bregu: Po e trajtojmë sikur ndodhi sot dhe përfundoi. Prokuroria është në kohë të kërkojë hetim për të gjithë. Prokurori duhet të kërkonte hetim pasuror, për titullarin e drejtorisë, sepse shkelje e barazisë në tendera mund të jenë edhe anëtarë të KVO që kanë qenë të detyruar. Kjo nuk do të thotë se titullari… Titullari duhej hetuar më ndryshe dhe nuk ka ndodhur.
Nuk është hera e parë kjo, GJKKO po jep dënime shumë të lehta për të gjithë, kryesisht për drejtorët e Bashkisë Tiranë, duke i përkëdhelur. Duhet analizë juridike për të dalë në përfundim, është punë e dobët e prokurorit apo lehtësi që ia jep gjyakta ish drejtorëve të Bashkisë Tiranë.
Iku gjyqi i parë i drejtorëve të bashkisë, nuk foli njeri që morën dënime me kusht. Kur të vijë rasti tjetër, mund të bërtasë opozita por ka mbaruar.
