Zjarri që ka përfshirë për të katërtën ditë radhazi fushën e mbetjeve në Vlorë vijon të jetë aktiv dhe ka shkaktuar shqetësime të mëdha për banorët e qytetit.
Tymi i dendur ka mbuluar një pjesë të madhe të zonës, duke e shndërruar atmosferën e qytetit bregdetar në një rrezik shëndetësor të mundshëm për të gjithë ata që banojnë apo vizitojnë Vlorën.
Djegia e mbetjeve në këtë vendgrumbullim nuk është një fenomen i ri për Vlorën. Edhe disa muaj më parë, në stinën e verës, fusha e mbetjeve u përfshi nga flakët. Pavarësisht kësaj, asnjëherë nuk ka pasur masa efikase për të parandaluar dhe ndaluar ata që e shkaktojnë këtë djegie.
Për më tepër, deri tani, nuk ka asnjë të arrestuar për këtë fenomen që përsëritet, çka ngre pyetje mbi menaxhimin dhe mbikëqyrjen e këtij problemi nga autoritetet kompetente.
Forcat zjarrfikëse e kanë thuajse të pamundur të shuajnë flakët!
