Autoriteti francez i mbrojtjes së konsumatorëve ka raportuar kompaninë Shein te autoritetet për shitjen e kukullave seksuale me pamje fëmijësh. Ky veprim vjen pak ditë para hapjes së dyqanit të parë fizik të kompanisë në Paris.
Drejtoria e Përgjithshme për Konkurrencën, Çështjet e Konsumatorëve dhe Kontrollin e Mashtrimit (DGCCRF) e ka referuar rastin te prokuroria, ndërsa ministri i Ekonomisë, Roland Lescure, paralajmëroi se do të kërkojë ndalimin e Shein në tregun francez nëse incidente të ngjashme përsëriten.
Sipas Lescure, ligji francez u jep autoriteteve të drejtën të kërkojnë bllokimin e aksesit në treg për raste që lidhen me terrorizëm, tregti droge ose pornografi me fëmijë. Ai shtoi se platformat online duhet të heqin përmbajtjet e paligjshme brenda 24 orëve, përndryshe rrezikojnë bllokimin nga ofruesit e internetit.
Më 3 nëntor u raportua se kukullat janë hequr nga platformat e Shein, ndërsa reklamat për to janë eliminuar nga AliExpress. Komisionerja e lartë për fëmijët në Francë, Sarah El Haïry, njoftoi se po hetohen edhe raste të tjera të ngjashme në platforma të ndryshme.
Ligji francez parashikon deri në 7 vjet burg dhe gjoba prej 100,000 eurosh për shpërndarjen e materialeve pornografike që përfshijnë fëmijë. Autoritetet theksuan se Shein ofron edhe produkte të tjera për të rritur, pa masa efektive filtrimi për moshën.
Shein, e themeluar në Kinë në vitin 2012 dhe me qendër aktualisht në Singapur, është bërë një nga liderët globalë të modës së shpejtë, duke operuar në 150 vende. Kompania është përballur me kritika të vazhdueshme për kushtet e punës dhe ndikimin në mjedis.
Hapja e dyqanit të saj në Paris ka ngjallur polemika të forta dhe ka sjellë një peticion online me mbi 100,000 firma që kërkojnë ndalimin e saj në Francë.
