Raporti i fundit i Fondit Monetar Ndërkombëtar (FMN) për Evropën parashikon rritje ekonomike më modeste për kontinentin, duke e lidhur këtë me plakjen e popullsisë dhe rënien e prodhimtarisë. Kosova, si pjesë e grupit të vendeve të Evropës Qendrore, Lindore dhe Juglindore (CESEE), pritet të përballet me rritje të çmimeve të ushqimit dhe energjisë, që janë faktori kryesor i inflacionit në këto vende. Sipas FMN-së, rritja e ekonomisë së Kosovës për vitin 2023 pritet të jetë 3.9 për qind.
Çmimet e mallrave, duke përfshirë energjinë, kanë një ndikim të madh në inflacionin, ku shoket në çmime mund të ndikojnë deri në 35 për qind të variabilitetit të inflacionit një vit pas rritjes. Vendet me varësi të lartë ndaj importit të energjisë, si Kosova, janë më të prirura për t’u goditur nga këto ndryshime. Ndërkohë, çmimet e ushqimit përbëjnë deri në 20 për qind të variabilitetit të inflacionit.
Të dhënat e Agjencisë së Statistikave tregojnë se ndonëse prodhimi i energjisë ka rënë, konsumi ka shënuar rritje, çka ka çuar në një rritje të çmimit të energjisë për konsumatorët dhe bizneset. Po ashtu, raporti nxjerr në pah se Kosova ka rritur importin e energjisë me 46 për qind në tremujorin e dytë të vitit.
FMN-ja tashmë parashikon një rritje më të dobët për tërë Evropën, për shkak të ngadalësimit të rritjes së produktivitetit dhe tkurjes së fuqisë punëtore. Ky fenomen, sipas FMN-së, është rezultat i moshës së plakur të popullsisë. Rritja e produktivitetit është thelbësore për përmirësimin e situatës, ku FMN-ja sugjeron stimulimin e inovacionit dhe thellimin e integrimit të tregut evropian.
Kosova, megjithatë, ka shënuar një rritje të ekonomisë, por për herë të parë pas pandemisë, ajo është ngadalësuar me 0.7 pikë përqindje, duke arritur rreth 4 për qind rritje, e cila mbetet më e larta në rajon.
