Florentino Pérez ka ndezur fushatën zgjedhore te Real Madrid, duke njoftuar se José Mourinho do të jetë pjesë e projektit të tij nëse rizgjidhet president i klubit madrilen.
Njoftimi u bë përmes rrjeteve sociale të fushatës së Florentino, ku u publikua një video me trajnerin portugez dhe mesazhin: “Flasin, flasin dhe flasin. Mourinho ka ende shumë histori për të bërë”.
Marrëveshja mes Mourinho dhe Real Madrid raportohet se është arritur prej javësh, ndërsa Jorge Mendes ka punuar për të zgjidhur detajet me Benfica. Trajneri portugez pritet të firmosë për dy sezone, me opsion edhe për një vit tjetër nëse fiton La Liga.
Objektivi i madh i Mourinho në rikthimin e tij te Real Madrid do të jetë Champions League. Në aventurën e parë, nga viti 2010 deri në 2013, ai fitoi La Liga, Kupën e Mbretit dhe Superkupën e Spanjës, por nuk arriti të triumfonte në Evropë, pavarësisht tre gjysmëfinaleve radhazi.
Zyrtarizimi përfundimtar pritet të vijë pas zgjedhjeve presidenciale, nëse Florentino fiton votimin e së dielës. Mourinho dëshiron të nisë menjëherë punën, pasi kërkon përforcime të rëndësishme në mbrojtje dhe mesfushë.
Portugezi nuk kërkon vetëm emra të mëdhenj, por lojtarë të uritur, me ambicie dhe pa ego të tepruar. Një nga emrat që duket pranë është Ibrahima Konaté, i cili mund të vijë si lojtar i lirë pas largimit nga Liverpool.
